城中鏡：雅虎女舵手挖名嘴助陣
依家大家經常用手機、板腦上網睇電視，雅虎女舵手邁耶睇準呢個趨勢，九月開始不斷羅致電視主播紅人，打造網上電視新聞報道平台，近日盛傳佢成功請到名嘴庫里吉（Katie Couric）過檔，呢位女主播來頭好勁，佢早年喺哥倫比亞廣播公司（CBS）報道晚間新聞，年薪高達一千五百萬美元，相信可為雅虎網聞平台增睇頭。
邁耶不斷羅致電視主播紅人，打造網上電視新聞報道平台。
名嘴庫里吉傳加入雅虎網上電視新聞報道平台。
邁耶過去兩個月積極挖角，一口氣喺《紐約時報》挖走科技評論家David Pogue、政治記者Matt Bai同埋編輯Megan Liberman等猛人。
分析員促多線變革
外界認為淨係邀得庫里吉坐鎮，已足以令雅虎日後更易吸引電視廣告客戶。
邁耶接掌雅虎差唔多一年半，除咗不斷收購同業，引入新產品元素之外，亦重新設計電郵版面，招聘更多工程同埋媒體嘅人才，但扭盡六壬之後，都未能轉化成顯著的收入增長。
分析員建議邁耶要變革就要徹底啲，搞新聞平台唔應該淨係着重內容播放，仲話多線變革呢方面可以學吓阿里巴巴。
