SUN搞作：少膽虫手記︰罷買何足懼

「弊傢伙！弊傢伙！」淫賤黎一早返到堆填區就大呼小叫，簡直擾人好夢，我惟有心中暗妖，再扮晒關心仆埋去問：「腦細，何事驚慌？」一拳揮來，少膽虫又中招，金星四冒之際，只聽見淫賤黎叫道：「乜乜正二聯盟話我哋散布抹黑、失實同仇恨嘅言論，要發起罷買壹全霉刊物，呢次死梗喇！」

眼見淫賤黎驚到標尿，少膽虫我忽然同情心大作，向淫賤黎許下諾言：「我少膽虫保證，罷買行動絕對唔會影響銷量，信我！」淫賤黎少有地向我報以一個感激嘅眼神，眼泛淚光咁話：「虫，如果呢關畀我大步檻過，一定加人工畀你！」

大家咪以為我少膽虫吹水，我真係唔放罷買行動喺眼內。點解？好簡單，壹全霉嘅刊物，根本就冇市場，平時都係當廢紙即印即堆填。原本冇人買嘅嘢，你再去罷買佢，呢個咁無謂嘅行徑，又有乜好驚呢？難得淫賤黎咁上心，我就再下一城振臂大嗌：「罷買何足懼，壹全霉萬碎！萬碎！萬碎！」

喺一片碎屍萬段嘅叫囂聲之下，淫賤黎露出滿意之情，少膽虫我又過一關。