政壇：陳維安想買臭氧洗菜機
立法會尋日破天荒同社企Green Monday合作推出「無綠不歡星期一餐單」，每逢周一喺立會餐廳提供素菜餐單，希望鼓勵更多議員同職員食素。出席啟動禮嘅秘書長陳維安自爆，話有議員投訴周三自助餐嘅蔬菜因為擺得太耐而變黃，一度諗過買部臭氧洗菜機返立會洗菜。
陳維安（左四）本身就係素食者，左一、左三係Green Monday創辦人魏華星同楊大偉，其餘係嚟支持素食嘅議員。
話說茹素多年嘅議員EQ葛珮帆早前喺立會宴會廳食飯時，見到啲菜由翠綠色變成泥黃色，於是叫陳維安諗計改善食物質素。
陳維安費煞思量，後來聽朋友講臭氧洗菜機可以延長蔬菜保鮮期限，於是考慮喺立會添置一部，但一部臭氧洗菜機要萬幾蚊，用嘅係納稅人嘅錢，最後梗係無買到啦!
信佛嘅人民力量「慢必」陳志全亦有逢初一、十五食齋嘅習慣，依家為響應活動更會食多兩日齋。
