政壇：貪曾 貪湯 醜事傳千里
俗語有話「好事不出門，醜事傳千里」。「貪曾」前特首曾蔭權爵士同「貪湯」前廉政專員湯顯明嘅貪腐醜行唔止令本港市民震怒，更已傳遍中外。廉政專員白韞六最近去咗巴拿馬共和國，但佢都放唔低「雙貪」。佢喺開國際反貪會議時就提到，廉政公署對多宗前官員嘅調查引起咗公眾關注香港嘅貪污情況。搞到外國都知道香港有貪腐問題，雙貪真係佗衰家喇!
設計圖片
各地代表雲集巴拿馬
貪曾同貪湯被踢爆連串貪腐醜聞，而前政務司司長許仕仁亦因涉嫌貪污被廉政公署檢控。白韞六前日喺巴拿馬共和國嘅巴拿馬城出席國際反貪局聯合會第七次年會暨會員大會。佢喺會上作全體會議演說時就分享咗香港嘅反貪經驗。佢提到廉署最近多宗涉及前任及現任高級官員同上市公司高層案件嘅調查同檢控都引嚟傳媒廣泛報道，亦引起公眾關注香港嘅貪污情況。
今次嘅聯合會會議有超過四百三十幾個來自一百個司法管轄區同八個國際組織嘅代表參加。貪湯同貪曾嘅醜行今次真係千里之外都傳通街咯。
雖然雙貪令香港蒙羞，但白韞六就話，根據廉署分析，香港嘅貪污仍然繼續受到有效嘅控制，而有關檢控亦正正印證咗不論涉案者係乜嘢背景、地位同身份，廉署都係會嚴謹依法、不偏不倚咁辦案喎!
廉署社區關係處處長穆斐文亦都喺會議工作坊上同各地區同團體代表講到，廉署作為一個不斷求進嘅反貪機構，會對公眾期望保持敏銳觸覺，亦會依法辦事同透過行之有效嘅監察制衡機制確保公正同問責性。之不過，講多無謂，相信要維護本港廉潔聲譽，都係將雙貪依法查辦至最實際。
