幼兒教育貴族化 天價遊學實太誇

有「平民名校」之稱嘅九龍城民生書院幼稚園，計劃搞「親子遊學團」，明年復活節去美國洛杉磯「開眼界」喎。呢個十天豪華團節目豐富，享受一流，兩晚入住寄宿家庭，其餘住四星酒店，仲玩埋迪士尼樂園等著名景點添。話明豪華，收費當然唔會低嘞，每位盛惠三萬大元，比普通旅行團貴兩成半，而且規定要有家長陪同，扣除每名學童一萬元資助，一大一細收費高達五萬元，仲未計保險、貼士同其他費用，名副其實「天價」遊學團。

校方話，辦遊學團除咗令學童開眼界，亦可以學習英文喎。喂，幼兒班學童得三歲左右，牙牙學語，英文程度最多只係識幾個單字，山長水遠飛十幾粒鐘去美國打個白鴿轉，咁就可以學習英文，有冇誇張啲吖？正如家長話齋，呢啲只係富貴家長嘅活動，物非所值不特止，仲會留下後遺症，製造更多怪獸家長，互相攀比，助長「唔去好冇面」嘅觀念。

冇錯喇，開眼界係假，借遊學團搞貴族化，提高學校「身價」就真。呢間非牟利幼稚園去年「跳船」退出學券計劃之後，半日制全年學費飆升至接近三萬三千元。以前遊學去新加坡同台灣，依家就直飛美國，無非想改變形象，由平民名校變成貴族名校啫！

幼稚園搞豪華遊學團，當局又點睇呢？教育局局長吳克儉話，家長要三思係咪畀子女參加，同時亦注意安全喎。講咗等於冇講。其實．正因為港府教育政策失誤，學校貴族化問題至會愈來愈嚴重，大學係咁，中小學亦係咁，家陣連幼稚園亦愈來愈豪華，問你服未。如果孔子翻生，一定搖頭慨嘆：吾不欲觀之矣！

呢嗱，以大學教育為例，資源已經嚴重不足，收生仲優待出得起錢嘅非聯招生，變相剝奪合資格聯招生嘅入讀機會。中小學問題更嚴重，傳統名校紛紛轉為直資，學費水漲船高，等於將基層子女拒諸門外。前排搞到滿城風雨嘅百年名校聖士提反女子中學及附屬小學計劃轉直資風波，就係最新例子嘞。

香港教育認真唔得掂，邊度仲有「知識改變命運」呢支歌仔唱吖。舊時上品無寒門，下品無世族，家陣重走舊路，學校分等級，認錢唔認人，學生分貴賤，愈窮愈見鬼。港府口口聲聲話要解決跨代貧窮問題，到頭來淪為大隻講。講多無謂，食多會滯，先搞掂教育不公再講喇，叮！