SUN搞作：少膽虫手記：「廢」到死
「死喇，南下喇，殺上門喇！」淫賤黎慘叫，唔通少膽虫最擔心嘅事終於要發生，「《爛果》亂港，北大人終於忍唔住要出手？」少膽虫二話不說，收拾行囊，衝入腦細房，「腦細，帶埋我一齊着草呀！」
淫賤黎搖頭，「走得去邊？我驚未出堆填區，我哋已經……」少膽虫驚道：「有無咁勁呀？」淫賤黎打開窗簾北望神州，「依家連『美國影帝』家輝哥都要走，有傳就係呢個原因。」
「美帝嘅人都頂唔住，《爛果》呢鋪肯定『滿江紅』！」少膽虫說畢，急忙左翻右尋。「染紅？一片黑就真。」淫賤黎喃喃自語。「腦細唔好再講咁多喇，快啲幫手搵吓仲有無『諾雞亞』手機！」淫賤黎一臉狐疑，「搵手機做咩？」危急存亡之際，淫賤黎仍然拾下拾下，少膽虫真係火都嚟，「梗係擋子彈喇，唔通用嚟打電話咩！」
淫賤黎訕笑︰「少膽虫，我講緊嘅係上面嘅灰霾南襲，肺會隨時唔掂！」少膽虫驚覺招已中，為顧存面子，惟有死撐，「我哋咁廢，的確係會隨時唔掂嘅……」
