SUN奇古怪：SUN潮語：【打老飛】
「打老飛」呢個潮語，並唔係指要毆打上咗年紀嘅飛仔。「打老飛」其實即係「打飛機」咁解，港式粵語好鍾意喺某啲詞語前面加個老字。例如快餐店麥記前面加個老字，變成老麥，又例如老廉即係廉政公署。「打老飛」都係同樣道理，喺飛機前加個老字，當堂親切感大咗，打都打得開心啲。近年「打老飛」或「打飛機」亦可以用嚟形容某啲人嘅行為或言論，只求自我感覺良好，而懶理別人感受。好多網民，甚至有啲學者，都相當熱衷喺網上「打老飛」，即係發表一啲激烈嘅言論，但係只流於自我發洩，而不會付諸行動，呢啲都被理解為「打老飛」嘅一種。
政府吹行風話下個月開始會進行政改諮詢，為二○一七年普選行政長官做前期工作。同時，有人話候選人都一定要愛國愛港，唔可以同中央對抗。佢咁講，即係話候選人喺入閘之前肯定有篩選，更加唔好諗嗰啲所謂公民提名，或者將西方文明嗰種普及而平等嘅普選原則套諸香港。最好笑嘅係，有言論話好多外國嘅國家都係冇普選，仲話有啲國家有普選之後，經濟同社會大亂。估唔到喺資訊高度發達嘅二○一三年，仲會有人講呢啲言論，難免被人覺得無知。事實上，香港受西方統治百幾年，教育水平經過四十幾年發展，已經足以同西方發達國家睇齊。愚民政策喺香港已經行唔通，如此講話，只係屬於「打老飛」式嘅自說自話，對統戰毫無幫助。
「打老飛」喺醫學上面係冇害嘅。但係在社會學上，「打老飛」實在惹人討厭。早排，藝人阿叻話如果TVB台慶收視剩番三點佢會跪地，呢啲連「打老飛」都不如嘅小學雞行為，不單令人討厭，直情令人作嘔！
