政壇：搞搞政：發叔力保大浪西灣 博連任鄉局主席
鄉議局近期喺大浪西灣納入郊遊公園一事嘅立場愈趨強硬，主席劉皇發（發叔）更喺立法會提修訂，繼反對擴建屯門堆填區後，再次同政府對着幹，有鄉紳估計近八十歲高齡嘅發叔呢兩次瞓晒身、博到盡，其實係同佢想再次爭取連任鄉議局主席有關，相繼出招都係為保主席高座嘅政績。
設計圖片
發叔同「貪曾」前特首曾蔭權爵士領導嘅上屆政府關係良好，但唔少鄉民同鄉紳對發叔同政府行得太近有微言，尤其嚴打新界村屋僭建問題一事更搞到好多人失望，今次政府以保育為由將大浪西灣納入郊野公園範圍，引起一眾鄉紳不滿，批評政府強搶民產，發叔就同政府保持好大距離，下個月四號，佢更會喺立法會提出修訂，要求將大浪西灣剔出郊野公園範圍，又發動廿七鄉村民一連三日馬拉松式包圍立法會，以體現鄉事派實力，為自己吶喊助威。然而，泛民今次掉轉槍頭支持政府，發叔嘅修訂好可能過唔到分組點票。
消息人士回報，尋日發叔孖住人民力量議員陳偉業（大舊）去咗元朗下白泥視察烏蠅為患問題，好難唔令人猜想發叔係向大舊拉票，令剔除大浪西灣嘅修訂有望通過。不過大舊就話到明，今次佢一定會跟隨泛民支持政府，反對發叔修訂，外人實在諗多咗喇！
