政壇：羅志光晒自家設計靚襟針
翡翠玉器多見於女士嘅首飾，香港玉器商會早前舉行三十八周年晚宴，會長羅志光就喺西裝衣領上佩戴咗一枚由翡翠同閃鑽鑲嵌而成嘅襟針，非常之搶眼。晚宴現場展示近百枚翡翠珠寶，以開心一口價供賓客認購，仲有靚花膠同玉器拍賣，唔少賓客踴躍競投，氣氛高漲，當晚籌到嘅款項將撥出三十萬元捐贈畀仁濟緊急援助基金。
羅志光（中）獲蘇陳偉香（左）同鄭李華熙（右）捧場。小圖為羅志光嘅翡翠閃鑽襟針。
羅志光笑笑口咁話，佢心口枚飾物叫做「事業如意」，係佢自家設計，其中玉器由代表事業嘅蜥蜴同代表如意嘅靈芝組成，再加上碎鑽鑲嵌，新穎兼好意頭。講到玉器行業嘅近況，佢透露十年嚟翡翠累計升值四百五十倍，雖然依家經濟放緩，但係優質玉器價錢依然繼續升，事關玉石買少見少，愈靚愈多人爭。
