政壇：黃仰芳靠少年警訊擴眼界
中區扶輪社主辦嘅第一屆香港青年服務領袖獎，前日正式啟動。活動籌委會主席係新鴻基尊尚資本管理高級董事黃仰芳（Fonia），靚女做大騷，唔少好友都出席支持。Fonia話，佢都係青少年制服團體嘅受益者，事關佢細個家境貧困，好彩中學時參加咗少年警訊，先至有機會嘗試人生第一次坐私家車、搭飛機同上電台、電視等，令佢擴闊眼界，至今仍感受益。
黃仰芳（右二）籌辦青年服務領袖獎，好友陳智思（左二）、林月萍（右一）同蔡敏思（左一）齊撐場打氣。
佢喺啟動儀式上表示，今次參與提名嘅青少年團體共有十三個，各推舉三名候選人，然後從每個團體三揀一，合共選出十三位青年領袖，勝出者將可獲象徵性獎金二千元，並獲資助海外服務之旅，同埋可以同局長或CEO對談。行政會議成員陳智思出任活動贊助人，佢話城中青年領袖獎項多籮籮，但呢個獎最特別係鼓勵十八至三十歲嘅後生仔，令到佢哋嘅領袖訓練可延續至升讀大學或投身社會。
