政壇：丁毓珠撐舊生子女優先入讀
北區幼稚園鬧學額荒，業界都好關注教育局新措施，東區區議會前主席丁毓珠話，由佢任校監嘅維多利亞教育機構旗下幼稚園，早喺多年前已推行網上派表，但佢就唔撐原區優先入學，認為舊生子女優先入學，對校方、家長同子女都係最好。
位於港島同九龍區嘅唔少傳統名牌幼稚園，即使未有雙非時，學額已長期相當緊張，所以多年嚟實踐咗唔少疏導搶學額嘅方法。丁毓珠話，不時都有朋友問佢學校仲有冇學位，甚至考慮特登搬近間學校提高入學機會，但佢強調旗下幼稚園最着重嘅唔係啲家長住喺邊區，而係提倡舊生子女優先。佢仲話，佢哋間幼稚園創立多年，唔少畢業生依家都已經做咗人哋嘅爸爸媽媽，畀舊生子女優先入學，一來家長會較熟悉學校嘅制度同教法，校方同園生家長溝通亦會好啲喎。
