政壇：港自推一孩政策25年
前行政會議成員林奮強創立嘅智庫「香港黃金五十」，早排發表香港人口問題嘅報告，建議未來本港要引入二十萬外來人才，否則人口老化會好嚴重。林奮強尋日出席一個電台節目時，繼續大講香港生育率低嘅弊病，佢話回歸前後，港人都因各種因素倍感生活壓力，夫婦都自願推行咗「一孩政策」，而且長達二十五年咁耐，佢直言生兒育女係「唔方便嘅事」，但香港卻需要多啲新生人口。可惜，呢邊廂林奮強高呼一個唔夠數，出席同一活動嘅八十後就嗌一個都唔敢生！
設計圖片及對白
20年後港勞動人口比例降
林奮強尋日出席節目時，有八十後人士同佢講啱啱結咗婚，但就唔敢生育，因為香港社會競爭大，擔心將來小朋友會輸喺起跑線上，又擔心生咗小朋友冇人湊；甚至有後生仔同林奮強講，香港已冇發展空間，仲話引入二十萬人嚟，到時唔止不宜生育，簡直係不宜生存。
林奮強就話早喺香港開始討論回歸起，啲人就唔想生小朋友，擔心生多個冇咁易移民；而回歸後又遇着經濟唔好、沙士等……咁多年，香港就算唔係強制推行一孩政策，但港人家庭都用咗一孩政策二十五年，結果香港同內地一樣面對人口老化嘅問題。對於港人唔肯生仔，林奮強暗批年輕人怕麻煩，佢話以前移民嚟香港嘅人就算父母喺內地冇人幫手湊仔，都生五、六個。
今時今日人人都求方便，但生仔實在唔係一件「方便」嘅事，佢話︰「家庭同愛都唔係方便嘅嘢！」意思係呢啲都需要人投入好多時間、心力甚至係資源，「愛唔係方便o架，但唔係因為方便至愛你o架嘛。」自比「中坑」嘅林奮強又話，過多十幾年佢就退休，而香港二十年後勞動人口比例亦會下降，唔引入外來人才嘅話經濟就會受影響，所以都係要引入外援嚟香港製造新機會喎。
