行人專區亂象多 斬趾避蟲嘆奈何

油尖旺區議會前日以壓倒性大比數通過動議，將旺角行人專用區開放時間由原來每周七日，減到只喺周六、日及公眾假期開放，其餘日子恢復行車，最快三至四個月後落實。咁就奇怪嘞，旺角行人專用區遠近馳名，一向深受市民同遊客歡迎，係品嘗美食、購物同體驗香港風土人情嘅好去處，點解失驚無神要大幅度縮短開放時間呢？唉，咪又係多得港產官僚好帶挈囉。

話說專用區內近年出現大量商業推廣、小販擺賣、街頭表演以及團體集會等活動，「易拉架」阻街、表演噪音滋擾街坊等問題愈來愈嚴重，直頭好似無王管，七國咁亂。行人專用區烏煙瘴氣，附近居民長期受噪音滋擾，有人甚至患上抑鬱症，連救護車亦因為區內道路太擠塞而寸步難行，你話係咪離譜吖。

更離譜嘅係，政府部門對呢啲亂象居然視若無睹，警察唔理，食環署袖手，消防當睇唔到，互扯貓尾，互相卸責。好似噪音問題咁，警方過去一年喺區內收到一千一百幾宗噪音投訴，到頭來檢控數字得十二宗咁大把，連個零頭都冇，佢哋話「舉證困難」喎，你信唔信吖？

計太一叮話齋，困難係假，懶惰就真。設行人專區本來係大好事，如果管理到位，既可以創造商機，刺激消費，又可以吸引遊客，成為旅遊熱點，市民同商戶都受惠，點會搞到天怒人怨呢？其實，行人專區唔係香港獨有，其他地方類似嘅步行街不知凡幾，好似美國紐約第五大道、英國倫敦牛津街同日本東京新宿大街等，人哋管理得井井有條，愈做愈旺，偏偏香港嘅行人專區搞到七國咁亂，家陣仲要縮短開放時間添，既然係咁，不如索性取消吖，笨！

唔怪得有人話，縮減行人專區開放時間根本係「斬腳趾避沙蟲」，唔只本末倒置，而且無助解決嘈雜滋擾問題。好簡單，表演者周六同周日唔會集體失聲，反而可能因為平時冇地方表演，到時一窩蜂湧去專用區，噪音同滋擾肯定更嚴重。話時話，要重整行人專區秩序，還靜於民，一啲都唔難，只要做到有法必執，執法必嚴，咁就冇問題喇。講到尾，當局非不能也，實不為也。

所以話，港產官僚眼高手低，連一個行人專區都管唔掂，旨意佢哋搞好香港，簡直係緣木求魚，叮！