「裸聊」呢個潮語嘅意思即係「裸體聊天」。「裸聊」當然就唔係指真係真人互相面對面裸體傾偈嗰種，雖然唔排除你會同你老婆或情人晚晚「裸聊」到天光。但係呢種潮語所講嘅「裸聊」，係喺網上進行。「裸聊」喺外國叫做Nude Chat，通常都帶有色情成分。做法就係一男一女（同性都得），各自脫清光，然後對住電腦嘅網上攝錄機，做出一啲猥褻嘅動作，並透過網上聊天室互傳情慾訊息，繼而進行網上性愛（Cybersex）。

互聯網嘅發明同普及，將人類嘅生活習慣、思考方式、溝通以至人際關係徹底改寫，甚至係時間地域等觀念，都可能要重新定義。現在智能電話進化成為現代都市人身體一部分，人類開始24小時活在互聯網之中，網內網外線上線下嘅界線開始變得模糊。

家陣出街搭車食飯，只見人人都係「低頭族」，好多人無論男女老幼，返到屋企二話不說就成尊佛咁，對住「芒」上網，人與人連基本溝通都無，社交能力自然退化。新一代莫講話談情，可能連基本語言表達都成問題。所以有好多網民開始怕見人，怕同人相處，因為喺網上又匿名又唔使見真樣，講嘢唔使負責任又無壓力。有啲網民甚至連尋歡作樂都喺網上搞掂，難怪愈嚟愈多人會誤墮「裸聊」陷阱！

通常玩「裸聊」都唔會見到樣，好多平時飽受性抑壓同道貌岸然嘅人，都對此趨之若鶩。近年「裸聊」喺大陸地區流行，有啲女性或男性仲會以此收費，仲出現咗好多騙案。有人未及風流，就被勒索騙財，人財兩空。香港同其他地區都開始多人玩「裸聊」，有本地網台節目主持都曾差點中伏。

正所謂色字頭上一把刀，「裸聊」呢家嘢雖然屬於虛擬世界，但係始終都要喺現實世界找數！唔知中共經過十八大三中全會，收緊互聯網之後，玩「裸聊」會唔會被拉去勞改呢？

第一手消息請下載on.cc東網iPhone/iPad/Android/Windows Phone Apps