政壇：《財富》風雲榜馬化騰奪季
內地經濟起飛，身家豐厚者急劇增長，美國《財富》雜誌本年度五十位商界風雲人物榜出爐，今年一共有四位中國企業家上榜，人數歷來最多，當中排名最高嘅就係第三位嘅騰訊CEO馬化騰，《財富》雜誌更加形容馬化騰先用QQ征服內地市場，依家再將目光放到海外，可能已經成為中國科技界最有影響力、最有權力嘅一位企業家。
馬化騰
騰訊今年股價表現非常理想，一月以嚟飆升百分之六十一，市值超過九百五十億美元（約七千四百一十億港元），如果由騰訊○四年上市開始計起，股價上漲近一百倍，而馬化騰嘅淨資產估計更高達一百億美元。雖然馬化騰喺內地科技界叱咤風雲，但佢一啲都唔自滿，佢喺內部演講時強調要主動求變、主動應招，希望管理團隊嘅工作氣氛「非常飢渴」。
馬化騰仲針對內地出現嘅富二代名詞，呼籲員工「要有激情、要好學、要開放」，打破過去富二代嘅概念，希望員工成為「闖二代、創二代」，帶領騰訊繼續發展。
