政壇：陸恭蕙讚個「聽」字構造靚
現代科技帶來唔少增進溝通嘅產品，但人同人之間嘅溝通依然存在唔少問題，環境局副局長陸恭蕙（Christine）尋日應世界童軍組織邀請，出席第一屆世界童軍教育會議，同來自世界各地嘅童軍分享環保及教育議題。
不過，Christine去到現場就臨時變卦，冇大講拿手嘅環保訊息，亦冇硬銷政策，反而分享佢嘅處世及為官之道，認為「用心聆聽」係好重要嘅溝通方法。
Christine利用投射銀幕向部分唔識中文嘅童軍拆解個「聽」字，佢大讚個字very beautiful（勁靚），除咗有「耳」，亦有「心」、「目」等身體部分，代表聆聽時須運用多個感官接收對方嘅訊息同感受。
佢講就叻，Christine依家做副局長，即使聆聽咗各界嘅反對聲音，有關政策始終都係要照推行，可見，耳到心唔到係無用嘅。
