政壇：潘佩璆愈後日子當紅利
前勞工界立法會議員潘佩璆卸任議員工作後，仍然好關心政事，星期三仲同所屬工聯會同事向特首梁振英表達施政報告嘅意見，潘佩璆當時戴住口罩，一問先知佢先頭患咗重病，依家要定期接受治療，為免受到感染阻礙療程，所以佢要小心保重身體。
潘佩璆話，佢今年五、六月時發現自己大便習慣改變咗，於是就拿拿聲去檢查，原來係大腸出咗大問題，要即刻做手術，依家手術完成，仲要接受療程。本身係精神科醫生嘅潘佩璆就話，好彩自己係醫生，對疾病警覺性都高啲，識得盡快檢查，當得悉確診時，雖然家人好擔心，佢自己反而好平靜。佢仲同兩個仔講，話佢哋已經成家立室，作為爸爸已完成責任，以後每一日都係「紅利」咁話。
雖然潘佩璆要到聖誕節先完成整個療程，但佢除咗接受治療嗰幾日請病假外，仍然堅持返醫院診症。佢話自己成世人都未試過攤抖，唔想坐喺屋企唔知做咩，況且佢份工唔使用好多體力，所以都想為病人盡番啲力喎。咁為得病人，希望佢都早日康復啦。
