政壇：徐錦熹匯聚「藝」力振畫風
香港畫廊協會主辦嘅首個香港畫廊周日前正式揭幕，城中藝術愛好者爭相到賀，協會聯合會長徐錦熹同民政事務局副局長許曉暉密密傾，原來佢哋都係銀行界出身，大家亦係半途出家，為追求理想而轉型，所以特別惺惺相惜。許曉暉本身都鍾意畫，佢透露兩個囡囡亦有習畫，同佢一樣都係嶺南畫派，不過囡囡嘅畫作仲未去到畫廊展出嘅水準，希望將來有機會喎。
許曉暉（右）同徐錦熹都係由銀行界轉型到其他範疇發展，難怪特別惺惺相惜。
鄧耀昇（右）報喜明年三月同從事婚禮籌辦生意嘅女友葉靄璇結婚。
徐錦熹話香港大約有一百家畫廊，協會成立目的係匯聚業界力量，推動本港畫廊社區嘅發展。佢話香港已係全球第三大藝術品拍賣市場，但仍未有足夠的本地收藏家，究其原因，一句講晒，係文化底蘊唔深，所以佢哋希望透過香港畫廊周嘅一系列活動，帶動港人參觀畫廊嘅風氣，唔好只係行街購物喎。
場中一對靚仔靚女好醒神，原來係舖王鄧成波孻仔鄧耀昇（Stan）同未婚妻葉靄璇（Vicky），Stan笑笑口報喜，話佢將於明年三月舉行婚禮，婚禮細節已交晒畀做婚禮籌辦生意的Vicky話事。
