白韞六（中）同穆斐文（右二）與美國司法部副總檢察長James Cole（左二）等人會面後合照。
「貪湯」前廉政專員湯顯明在任時豪花公帑，藉外訪之名遊山玩水，結果被立法會政府帳目委員會公審外，廉政公署亦對佢展開調查。現任廉政專員白韞六近日去咗美國同巴拿馬共和國訪問，並出席國際反貪會議，今次外訪白韞六好有交帶，除咗發新聞稿交代佢同隨行人員嘅外訪活動詳情、同咩人會面之外，仲上載埋照片添，明顯係要撥亂反正。
白韞六就同廉署社區關係處處長穆斐文今個星期日已經啟程，要到下周三先返港添。不過白韞六早前同美國司法部副總檢察長James Cole、紐約市調查局局長Rose Gill Hearn及世界銀行副行長Leonard McCarthy等會面嘅合照就被廉署放上網，介紹訪問詳情，尋日白韞六同穆斐文結束咗美國行程，出發去巴拿馬城，出席國際反貪局聯合會第七次年會暨會員大會。廉署指白韞六有專題演說外，仲特登提及穆斐文喺會議工作坊亦有主題演講。
佢哋做得咁細，皆因貪湯在任廉政專員期間外訪雲南就變咗去麗江遊覽玉龍雪山，外訪四川又變成睇樂山大佛，就連香港嘅案件佢都懶理，廉署要挽回形象，惟有從根本做起。
第一手消息請下載on.cc東網
