政壇：泛民謀加建立會浴室
立法會議員范國威（Gary）近排變咗議會惹火人物，仲係帶頭打破立法會規矩嘅「壞孩子」典範，繼將議員使用嘅泊車位畀非議員長期使用後，又帶咗多個留守政府總部嘅香港電視網絡員工去議員專用嘅休息室沖涼房沖涼，仲趕走保安員添，搞到議會好似冇掩雞籠咁，行政管理委員會日前決定向佢發出警告信，件事尋日仲有餘波，泛民中人建議議員助理都可以喺議會沖涼，咁唔爭在秘書處職員、保安甚至記者喇，或者一步到位，將立法會議員浴室開放為公共浴室就乜都解決晒！
設計圖片及對白
慷納稅人之慨
泛民主派尋日喺飯盒會討論議會沖涼一事，泛民代表認為，議員應該遵守立法會嘅規矩外，亦唔可以阻住保安員執法，暗批Gary趕走保安員嘅行為唔啱。不過，班泛民代表就覺得立法會依家只得兩個沖涼房唔係好夠用，提出向行管會建議增加沖涼房數量，仲話最好喺每層樓加建一個議員助理專用沖涼房，就算做唔到，最低限度都要喺地下整番一至兩個沖涼房喎。
佢哋為議員助理爭取呢啲福利時，有冇諗過喺議會工作嘅其他人呢？更重要嘅係，加建咗呢啲設施係咪物盡其用？依家議員專用沖涼房嘅使用率已經好低，所以Gary早前違規後，就用呢個理由為自己開脫，意思係佢帶人入議會沖涼，都係善用資源啫。咁泛民議員建議立法會再加浴室，係咪有數據或證據顯示啲議員助理有實際需要、且會善用資源呀？定係純粹慷納稅人之慨，為佢哋籠絡員工呢？啲立法會議員成日鬧政府亂用錢，佢哋有冇自己檢討吓呢？
有人話，其實部分泛民議員助理本身亦係示威常客，如果為議員助理專設浴室，佢哋會唔會又效法Gary帶街外人入去沖涼呢？為免到時問題不絕，不如一次過開放議會浴室做公共浴室好過喇。
