米蘭站嘅老闆姚君達傾緊賣盤，仲話分分鐘有全購可能，近年股價低沉嘅米蘭站股價尋日即刻一支箭咁飆高超過八成。米蘭站上市之後嘅業績認真麻麻，仲好幾次發盈警，大家都估估吓，究竟何方神聖有興趣接手？

姚君達傾緊米蘭站賣盤，睇吓最終賣唔賣得成啦。（資料圖片）

咁啱米蘭站嘅勁敵，同樣係賣二手袋嘅Brand off尋日有新舖開張，呢間日本品牌嘅老闆安山勉都有嚟主持開幕，傳媒梗係關心佢哋有冇對米蘭站「嗒糖」啦！安山勉就話冇咁嘅興趣喎，但就有興趣嚟香港上市，但幾時就賣關子先！

如果Brand off都嚟香港上市，咁同米蘭站可謂由商場鬥到落股場，都幾有睇頭喎，話晒米蘭站依家仲未有同樣業務嘅股份可以比較。不過，講開又講，米蘭站因業務獨特，兩年前啱啱上市嘅時候都掀起過一陣炒風，點知股價到依家跌到咁殘，尋日雖然勁升，但一點零九元嘅收市價同當年一點六七元嘅招股價比，仲未返到家鄉。睇吓米蘭站賣唔賣得成盤，轉唔轉到運啦！

第一手消息請下載on.cc東網iPhone/iPad/Android/Windows Phone Apps