城中鏡：名人千里撐四叔善舉
恒基地產主席「四叔」李兆基捐建四川廣元市中心醫院，前日舉行以佢命名的內科大樓落成啟用儀式時，好多城中名人千里撐場，包括立法會前議員「IQ博士」黃宜弘同太太梁鳳儀、理工大學前校長潘宗光同現任恒地獨立非執董胡經昌等人。廣元位於四川、陝西同甘肅三省交界，位置偏遠，眾人要專程去深圳機場搭內陸機至去到。IQ博士話今次係首次到訪廣元，但幾遠都話冇所謂。
黃宜弘（左）同梁鳳儀拍拖去川北撐李兆基。
潘宗光亦專程到廣元出席儀式。
IQ博士告別政壇後生活逍遙，太太梁鳳儀爆料話，老公做議員時好唔得閒，卸任後終於可以做多啲嘢，除咗睇住自己盤包裝印刷生意外，仲周圍去旅行。IQ博士一向好鍾意跳社交舞，舊年佢哋終於去咗英國觀賞社交舞賽事，今年原本想到南極探秘，點知旅行團逼爆，惟有等明年。至於梁鳳儀同四叔一向老友，四叔本自傳正係出自佢手筆。佢話同四叔已相識三十載，自然要去撐場。
