城中鏡：利子謙遊銅鑼灣 細數家族輝煌史
銅鑼灣利園山道一帶，上世紀六十年代前一直係利希慎家族嘅私家地段，閒人免進。家族集團為紀念買地進駐銅鑼灣九十年，特別喺旗下三個商場舉辦展覽，齊齊時光倒流九十年。
利希慎家族後人利子謙返港湊巧經過利園，同我哋分享童年趣事。
呢張法式貴妃椅以酸枝木製造，巧妙地融合中國民間精粹，兩邊扶手雕有鴛鴦，更顯貴氣。
丁新豹（左）同希慎興業建築設計及項目總監陳麗喬細說利園山歷史。
Hysan Place、利園同利舞臺尋日變身華麗復古舞台，除咗展出大量相片同歷史真迹，展現利園山近百年來嘅巨變，更將上一輩港人嘅集體回憶「利舞臺劇院」嘅旋轉式舞台以模型原址重現。展覽嘅一角，突然發現已喺紐約定居多年、利希慎家族第三代後人利子厚嘅哥哥Harry利子謙在場。
細個係利舞臺擁躉
原來Harry對展覽毫不知情，只係返港行經自己地頭嘅利園，先發覺自己成為展覽嘅歷史見證人，既驚且喜。問到對香港生活嘅回憶，Harry話最懷念嘅一定係家族位於堅尼地道、現址已拆卸改建為竹林苑嘅大宅。Harry記得當年家族每逢開派對，成班細路都會聚埋一齊打乒乓波，圍威喂已經好開心。Harry更透露，以前係利舞臺戲院嘅擁躉，成日入場睇戲o架！唔知Harry當年作為少爺仔，究竟使唔使買飛入場呢？
除咗重現懷舊舞台，場地仲放置咗唔少當年利家大宅嘅家具擺設，每件都係中西合璧、貴氣非凡，兜個圈都彷彿置身昔日大戶人家嘅豪宅。現身展覽為大家細說當年嘅香港歷史博物館前館長丁新豹話，利希慎家族自十九世紀起已經係香港開埠嘅名門望族，及後發展蓬勃。
