咪以為議員助理啲工作只係手板眼見工夫好容易做，議員作為民意代表，要經常留意社會發生嘅大小議題，但係靠一雙手邊做得晒，於是就各議題做資料收集等工作就落喺助理身上。

好似新界西嘅議員田北辰咁，無論教育、環保、醫療、交通等政策瓣瓣都想掂，所以就算請足三個政策研究助理都仲未夠，話要請多一個先夠數。不過，連佢都大嘆現時求才困難，應徵者一係唔啱心水，一係經驗不足，仲試過有應徵者竟然淨係着住條短褲去寫字樓見工，搞到佢真係揀唔落手。據理解，有啲議員請唔到人，皆因人工出手太低；亦有議員出得起錢請人，亦可能因為應徵者擔心老闆要求太高而卻步。

咁啱漁農界嘅「高佬賢」何俊賢同新界西嘅陳恒鑌嘅寫字樓近來都適逢有人劈炮唔撈，現正煩惱緊請人。高佬賢話議員助理呢行算係冷門行業，加上合約最長只得四年，如果議員連任唔到，就好可能要執包袱走人，所以唔少人寧願做第二行，都唔想做呢個高危行業。不過，早前都愁緊請唔到人嘅工聯會麥美娟同「慢必」陳志全，最近已成功請到心水助理，寫字樓終於可以齊人開工喇！

第一手消息請下載on.cc東網iPhone/iPad/Android/Windows Phone Apps