地方行政高峰會成為張炳良瞌眼瞓「釣魚」嘅高峰期。
政府一直強調「民生無小事」，話要同地區工作嘅溝通協調，因此整個問責團隊上任後都不停落區會見市民。其中因建屋爭議而經常捱轟嘅運輸及房屋局局長張炳良，唔知近期係咪忙於落區「撲火」搞到冇覺好瞓，尋日朝早出席地方行政高峰會交流時，就多次當住傳媒、官員同區議會代表約六十幾人面前瞌眼瞓「釣魚」，認真失策。
張炳近來為咗長遠房屋策略諮詢頻頻落區，加上機場管理局高層近日就機場北部土地用途引發內鬥，董事會成員羅康瑞更一氣之下劈炮辭去基建規劃委員會主席一職，有傳令政府喺機場興建商業中心嘅如意算盤遇阻滯，佢唔頭痕就假喇。
唔知係咪因為咁，佢尋日同部分局長出席高峰會同地區代表交流期間多次烏眉瞌睡，雖然佢睇嚟只係閉目養神，冇瞓到流口水出洋相，亦識得喺適當時候、例如講到房屋發展問題即刻醒水坐番正，但真係奉勸佢要多啲休息。
第一手消息請下載on.cc東網
