岑智明上任天文台台長兩年多以來，除熱衷日常天文氣象工作外，得閒仲會上拍賣網競投昔日本港受風災影響同舊香港面貌嘅相片或明信片，當中明信片閒閒地都要幾百元一張。尋日佢同傳媒聚會時，就展示咗幾十張私人珍藏，包括兩張一九三七年本港受颱風吹襲期間令一艘船沖上中環岸邊嘅相片，佢透露用咗近四位數字金額購買，仲話收集咁多舊風災相片，係用作日後寫書之用。

岑智明展示兩張一九三七年香港受颱風吹襲嘅舊相片，風暴潮令一艘船沖上中環岸邊。

講到私人珍藏，岑智明愈講愈開心，仲提到試過用三千元買咗張昔日訊號山面貌嘅相片；又話有個朋友用咗一千一百幾美元喺網上買咗張昔日香港面貌嘅舊相片，而自己就喺太子某間收藏店以較低價錢購入，講到呢度佢即時露出一副滿足嘅笑容。

第一手消息請下載on.cc東網iPhone/iPad/Android/Windows Phone Apps