政壇：會計師公會虧轉盈唔使加費

仲記得香港會計師公會（下稱會公）舊年度因錄得八百萬元赤字而需要加費，令部分人唔滿意，卒之喺舊年年底嘅AGM（周年大會）上發難。聽聞最近會公行政總裁丁偉銓向會員披露，今年度會公嘅財政狀況已大幅改善，轉為錄得盈餘五百萬元。換句話說，今年唔使再喺AGM提出加費建議。

左起：丁偉銓、趙麗娟、陳錦榮同陳美寶合力將會公盤數搞番靚。

會公今年度嘅AGM已訂喺下月十三日舉行，既然唔使加費，唔知去年領導發難嘅「三子」，包括龔耀輝、鄭中正同馬振峰，仲會唔會喺AGM做場「大龍鳳」呢？不過，前車可鑑，會公都唔敢怠慢，今個月三十號會率先搞場理事會選舉論壇，等啲候選人可以多啲同會員溝通。今年要重選嘅理事包括「三子」之一嘅龔耀輝。

AGM仲有一個目的就係選出新一屆會長，舊年趙麗娟做咗會公四十年來首位女會長，咁今屆邊個會跑出？依家會公兩名副會長分別係陳錦榮同陳美寶，論資排輩，陳錦榮做會長看高一線。