政壇：泛民內訌鬼打鬼
全國人大常委會副秘書長兼基本法委員會主任李飛訪港，講述《基本法》同政改嘅法律問題，但李飛未開口，香港班泛民主派已經鬼打鬼，各持己見。佔領中環行動發起人戴耀廷希望李飛唔好講太多政改議題，以免削弱港府主導地位，點知真普選聯盟（真普聯）召集人鄭宇碩又話，李飛應該接見全體議員，如果見到面就肯定係傾政改啦，同為泛民都口徑不一，十足一盤散沙。
以往每逢有內地官員訪港，好多泛民都會批評內地官員指指點點，干預香港內部問題，違反一國兩制。但今次偏偏相反，李飛今日同過百名各界人士午宴，當中有兩位係泛民議員，就係因為呢點，真普聯尋日竟然開記者會，批評李飛嚴重偏聽，唔應該只接見個別議員，要求李飛會見立法會全體七十名議員。
建制睇到陰陰笑
泛民成日講三權分立，如中央官員到港，點名要見全體七十位議員，咪又畀人話干預立法會、矮化香港地位囉。好在今次泛民都傻唔晒，戴耀廷就話自己無需要同李飛見面，而且希望李飛唔好講咁多嘢，最好唔好談及政改問題咁話。作為泛民支持者，聽見真普聯鄭宇碩同戴耀廷各執一詞，都唔知支持邊個。
今次單係李飛來港，已引發泛民內部口徑不一，如果有再高級官員來港，肯定更加混亂，建制派見到必定陰陰嘴偷笑，一盤散沙去爭取民主，認真係得啖笑。其實泛民好笑嘅事又點得咁少吖，話說兩位泛民議員之所以獲邀出席午宴，主因係佢哋擔任委員會嘅正副主席，並非兩人嘅政治背景，點知就惹來「嚴重偏聽」質疑，泛民會唔會諗多咗抑或上綱上線呢？
