控煙一味加稅 庸官遺害社會

再問大家一個問題，如果港產官僚五年唔交功課，會有咩後果？答案係唔使受罰不特止，仲可以升官發財添！

唔係講笑，港府賞罰不明，官官相護，廢柴官僚唔交功課反而有賞一啲都唔出奇。嗱，故事嘅主角咪就係臭名昭著嘅前食物及衞生局局長周一嶽囉。

話說法例規定，食衞局必須每年向立法會提交吸煙與健康委員會年報同帳目，點知自從周一嶽擔任局長以來，食衞局一直無按法例規定提交報告，足足有五年控煙撥款不知去向。唔怪得周一嶽嘅花名叫周一鑊喇，真係鑊鑊新鮮鑊鑊甘，連報告都懶得交，你話係咪離譜吖？家陣佢就走咗去做平機會主席，繼續風流快活，難為繼任嘅高永文要替佢執手尾，真係無辜。

食衞局點解唔交年報？周一嶽一味耍太極拒絕交代。而與此同時，吸煙與健康委員會則建議港府新一年度再次大幅提高煙稅，問你服未。唉，港府控煙來來去去都係獨沽加稅一味，究竟有幾大成效呢？

有組織調查發現，港府年年加煙稅，受益嘅唔係市民嘅健康，而係走私集團，估計全港消耗嘅香煙之中有近三成六係私煙，等於每年十八億支，令庫房每年損失三十三億元稅收。至於吸煙人口，雖然輕微下降到六十四萬五千人，但女性同高小學生煙民比例不跌反升，當中小四至小六男生吸煙人口比例甚至比一○年激增一倍有多，超過四成七歲以前已經食第一支煙。

正所謂，長江後浪推前浪，煙民自有後來人，港產官僚吹水要打造「無煙香港」，睇怕都係得個講字。鬼咩，信佢一成，雙目失明，周一嶽在任時渾渾噩噩，一味識加稅，唔識加強宣傳教育，連控煙年報都唔肯交，旨意佢控煙喎，蛇都死喇。

即係咁，雖然控煙年報不知所終，但若果要為周一嶽本人嘅表現寫報告，相信大家心中有數，「無能」兩個字講晒。講真吖，周一嶽尸位素餐咁多年，醫療衞生及食物安全七國咁亂，連骨灰龕位都搞唔掂，如果佢仲有半點羞恥之心，早就應該自動消失喇。計太一叮話齋，吸煙危害健康，廢官危害社會，港府縱容無德無能嘅周一嶽做平機會主席，根本就係違反平機會宗旨，叮！