SUN搞作：少膽虫手記：腦殘
「腦腫，因乜戴住個頭盔喺辦公室行嚟行去？」菜嫌貴疑惑問少膽虫。「前幾日四樓個天花板有石屎剝落，擊中咗肥豪隻腳；尋日呢層個閉路電視冧咗落嚟，好彩冇整親人！」少膽虫字字鏗鏘。
「少膽虫！」淫賤黎突呼喚少膽虫，少膽虫立即仆過去請示。淫賤黎怒氣沖沖問：「個閉路電視跌咗落嚟，你有咩解釋！」「腦細，個閉路電視大大話話用咗十八年，已經生銹同老化，又冇人維修，好危險啫！」少膽虫道。淫賤黎一臉愕然，少膽虫補充：「腦細，我哋已經撈唔掂，又窮又霉，仲邊度有閒錢搵人維修吖！」
淫賤黎聽得氣憤：「冇人整，你整咪得囉！唔係請你返嚟做乜！」「我假假哋都係個腦腫喎！」少膽虫據理力爭解釋。「難道由我整？」淫賤黎說道，一個拳頭打喺虫身，然後彎腰喺櫃桶摷嚟摷去，搵頂帽戴住。少膽虫：「腦細，你頂帽……」「你有頭盔，我都要戴番啲嘢保護吓o架！」淫賤黎得戚道。
少膽虫望住頂綠色嘅帽，得啖笑……
