城中鏡：阿松過檔南豐做CEO
本港老牌地產商南豐集團挖咗黑石集團（Blackstone）大中華區主席梁錦松，明年二月過檔做南豐行政總裁，其實一啲都唔奇怪，最重要係睇阿松可以帶領南豐去到幾盡？有賓卡老友不約而同話，阿松首項大任，相信係要重整南豐資產同上市。
梁錦松首項大任，相信係要重整南豐資產同上市。（資料圖片）
南豐主席陳慧慧話，梁錦松帶領嘅業務將涉及房產、開發、建築、資產管理等領域。但阿松會繼續擔任黑石高級顧問同國際顧問委員會成員，即係全球最大私募基金之一嘅黑石，將會同南豐保持緊密關係，第日無論投資發展同上市搵基礎投資者都咁方便。有老友分析，阿松○七年加入黑石就引入中投入股三十億美元，顯示佢嘅內地人脈深厚，近年主要協助黑石喺內地收購房地產資產，例如早前傳黑石以四億美元，入股內地商場營運商深國投商置四成股權，亦傳係松哥手筆，所以南豐挖佢絕對有理由。
