城中鏡：徐子淇捐鏈 助愛滋遺孤
香港人善心爆棚，最近有拍賣行將舉行慈善拍賣，幫助內地嘅「愛滋遺孤」，城中名人紛紛響應，包括千億新抱徐子淇、周大福珠寶集團執行董事鄭志剛、英皇鐘錶珠寶董事總經理楊諾思等名人，共捐出十七件珠寶同手錶公開拍賣，收益全部捐贈畀智行基金會，用作援助受愛滋病影響嘅兒童。
徐子淇戴上捐贈嘅小珍珠配祖母綠及鑽石長項鏈。
鄭志剛亦有捐出物品拍賣做善事。（資料圖片）
徐子淇捐贈嘅係一條小珍珠配祖母綠及鑽石長項鏈，佢仲親身戴住條鏈畀大會影相，希望吸引有心人競投。該拍賣行話徐子淇捐出嘅珠寶年份約為一九一五年，估價大概七萬至九萬港元。咁拍賣行當然希望愈高價拍出愈好，事關係慈善拍賣嘛！
智行基金會喺九八年成立，理念係將智慧付諸實行，幫助不幸嘅人。該會喺中國嘅工作，主要係照顧「愛滋遺孤」，並以教育為重點。直至今年六月，該基金會累積資助超過一萬五千名「愛滋遺孤」，當中包括小學生、初中生、高中生同大學生。
