城中鏡：超鳳畀賭王驚喜
香港女童軍總會前晚舉行周年大會暨晚宴，賭王何鴻燊女兒Daisy何超鳳接任新一屆總監，而將於明年四月下旬卸任嘅現任總監彭徐美雲，就升呢做副會長。Daisy笑笑口話因工作太忙，至今仍未同爸爸匯報，但相信爸爸喺報章得悉佢當上總監後，必定好開心。賭王近況如何？佢話爸爸精神好好，仲周不時攻打四方城添！
何超鳳（右）將接替彭徐美雲（左）擔任總監一職。
同為醫生嘅陳曦齡（左）同王賜豪（右）好啱傾。
莎莎太子女郭詩慧都去支持擔任副會長嘅媽咪郭羅桂珍。
鍾小芬（左起）、蔡李惠莉、邱吳惠平同戴胡美蓉齊現身支持女童軍大家庭。
當晚城中名媛靚太女童軍齊現身，包括四洲集團主席戴德豐夫人戴胡美蓉，玩具大王蔡志明嘅太太蔡李惠莉及遠東發展榮譽主席邱達昌夫人邱吳惠平等副會長，仲有著名心臟科醫生謝德富太太陳曦齡及同珍後人王賜豪醫生，特首夫人梁唐青儀亦以會長身份出席。離開咗女童軍兩年幾嘅教育局前局長孫明揚嘅太太鍾小芬都有到場，佢話會一如既往咁支持女童軍喎！
彭太卸任冇唔捨得
以唯一候選人及全票當選總監嘅Daisy好開心，話自己八歲起加入女童軍至今，投入感有增冇減。來年上任後，首先要主力搞好第三十五屆女童軍協會世界會議，佢希望藉此提升香港嘅世界地位。展望未來三年任務，仲有籌備新總部搬遷，緊接其後係香港女童軍總會成立一百周年慶典，每樣嘢都好需要會內手足鼎力支持。
彭徐美雲就笑笑口咁話，雖然卸任在即，但完全冇唔捨得嘅感覺，事關佢仍然留喺女童軍。諗番任內最難忘嘅事，莫過於親自帶小朋友訪問北京，令到下一代更加認識中國，未來會照樣大力支持Daisy咁話。
