政壇：搞搞政：帶示威者入立會浴室 范國威又「犯國規」
立法會本月初辯論用《立法會（權力及特權）條例》要求政府交出審批發牌嘅文件，當日政府總部同立會大樓外有大批撐發牌嘅人士聚集。議員范國威當晚就帶咗十個留守政總嘅香港電視網絡員工，去立會議員休息室嘅沖涼房沖涼。由於休息室係議員專用，當時有立會保安員就勸喻佢，但佢冇理會，仲趕走保安員添！佢早前已被踢爆為前議員鄭家富申請泊車證違規泊車，依家又違規帶示威者入立法會沖涼，難怪被外人封為「犯國規」喇！其實當晚資訊科技界嘅莫乃光都有帶人去議員休息室沖涼，完全當正立會係無掩雞籠。
設計圖片及對白
行政管理委員會尋日開會討論事件，並裁定議員帶人去休息室沖涼係違規。莫乃光解釋話當日咁啱喺休息室外遇到議員梁國雄嘅助理，基於人道理由先安排嗰個助理入去沖涼，而佢亦都就今次違規向行管會致歉。但范國威依然死撐，建議立會增加多幾格沖涼房，方便日後帶人去沖涼，由於佢當日趕走保安員，行管會就決定向佢發警告信，日後亦會喺休息室當眼處張貼告示。
至於辯論特權法動議當日，一班泛民議員在會議廳外請願，將收集到嘅撐發牌市民簽名同「誠實豆沙包」派畀建制派議員，搞到班建制派議員喺傳媒鏡頭面前尷尷尬尬，唔知接好定唔接好。有行管會委員就建議限制議員喺會議廳外表達訴求，例如唔准騷擾到其他議員同影響議員出入會議廳。行管會各委員最後都係決定再各自同黨友傾下先喎！
