醫院管理局新界東聯網前行政總監馮康鍾意行山、跑步，估唔到當年佢締結良緣都靠「渡萬重山」。馮康尋日為著作《輕舟過．渡萬重山》舉行新書發布會，邀得佢多年老友、社聯總裁方敏生做嘉賓。方敏生即場踢爆馮康讀大學時已經「不守本分」，跨界別由醫學院走去女生宿舍搵現任市區重建局行政總監譚小瑩（馮太）「溝通」。

馮康（前排左三）出新書獲跨界別老友捧場。

方敏生透露，當年同譚小瑩讀香港大學社會科學系，住埋同一幢宿舍，當時已知道馮康經常「跨界別溝通」，但直至畢業後喺餐廳撞到佢哋，先知原來兩個靜雞雞結埋婚生埋女。佢仲講笑話肯定馮康離開醫管局後，去到下一站都會「不守本分」，跨界別同人溝通。

但自稱「與馮康共度最多夜的男人」嘅律敦治醫院綜合內科服務部主管王春波就幫馮康講好說話，話馮康唔止對老婆專一，連行山都專心一致，試過有毅行者女隊員投訴佢行山時一句嘢都唔講。馮康將自己十幾年寫過百篇文章精挑細選結集成書，係希望成為歷史存檔，而本書所有版稅收益仲會捐畀「香港沙士互助會」添！

第一手消息請下載on.cc東網iPhone/iPad/Android Apps