政壇：華爾街甜心跟梅鐸搵食
每日美股收市前一個鐘喺CNBC節目《Closing Bell》為大家報道市況、人稱「華爾街甜心」嘅女主播巴爾蒂羅莫（Maria Bartiromo），即將過檔「傳媒大亨」梅鐸旗下嘅霍士財經頻道（FBN），結束同CNBC長達二十年賓主關係。據報，Maria過檔後都會主持一個即市節目，甚至可能喺霍士新聞亮相。
巴爾蒂羅莫將過檔梅鐸旗下嘅霍士財經頻道。（資料圖片）
Maria過去二十年喺CNBC嘅生涯只能用傳奇去形容。佢九三年加盟CNBC短短兩年後，就成為首位喺紐交所做即時報道嘅新聞從業員。隨後多年知名度有增無減，先後得到「金錢甜心」、「經濟BB」等外號，猶如財經新聞大眾化嘅象徵；○八、○九連續兩年憑記錄片勇奪艾美獎，○九年仲畀《金融時報》封為「五十大風雲人物」添！
目前FBN嘅家庭覆蓋率只有CNBC大約七成；喺二十五至五十四歲呢班商戶廣告重點推銷對象嘅收視率，更只有CNBC三成。Maria可否幫到FBN追貼、甚至爬CNBC嘅頭，暫時仲係未知之數。
但暫代佢主持《Closing Bell》嘅埃文斯（Kelly Evans）肯定就係今次嘅大贏家。埃文斯芳齡二十八，除咗被形容為「對經濟同市場有『瘋狂』程度認識」外，仲係Twitter界「明星」，話唔定有望成為第二個Money Honey o架！
