政壇：特首辦請鄉紳食檸檬
節約同環保係全球大趨勢，今屆政府亦有咁嘅主張，但呢個主張未必人人受落。
設計對白
事緣新界鄉議局本月收到一封來自特首辦嘅信件，下款係行政長官私人秘書，話日前收到鄉議局惠贈特首嘅《鄉情》刊物，謹此致謝。但基於政府奉行環保原則，所以叫鄉議局日後毋須再寄贈有關刊物畀特首嘞，最後再加一句「有拂美意，尚請見諒」，搞到鄉議局一眾執委感到不滿，唔接受特首辦拒收嘅理由。
老實講，當年鄉議局主席劉皇發就因為想加強同鄉民嘅溝通，特登搞咗份《鄉情》出嚟，仲出埋錢贊助添！呢次特首辦封信，真係將大大個檸檬塞入發叔個口，肯定心酸到痹！
真係咁唔環保？
《鄉情》係鄉議局每隔三至六個月出版一次嘅刊物，內容除概括局方處理過嘅問題外，仲有訪問執委嘅報道。雖然鄉議局網站亦有《鄉情》嘅電子版本，但上載時間就遲過印刷本最少兩至三星期。鄉議局尋日開會傾到特首辦拒收《鄉情》一事，即刻議論紛紛，有執委仲發晦氣話，佢哋一向都有寄刊物畀社團、地區團體及政府機構，但既然特首辦咁環保，以後連電子版都唔使製作喎！
據悉鄉議局執委前日都曾經討論到呢件事，唔少意見都話政府唔畀面。其實環保本來係一種美德，但了解《鄉情》都好重要，如果深入了解，相信可以省卻好多麻煩，其實《鄉情》幾個月先至出版一次，真係咁唔環保？
