敬老一年只一日 港府不孝更不智

等太一叮講具體啲啦。尋日係一年一度「長者日」，本港多間機構為長者提供優惠措施，其中港鐵同巴士等公共交通工具更加免費任搭，令唔少公公婆婆重拾嗰份人見人愛，車見車載嘅自信與滿足。另外，亦有超級市場提供折扣優惠，老人家袋住一張長者卡，等於手持貴賓卡，簡直好似廣告咁講，高人一等，尊享禮遇。

只可惜，廣告唔係真實，老人家生活無憂嘅畫面亦只係幻覺。講句唔好聽，港府平日對長者刻薄寡恩，不聞不問，每年淨係喺長者日整色整水，大搞敬老騷，根本就係虛偽喇！唔講其他吖，就講乘車優惠，內地好多城市早已畀老人免費搭公交，點解香港仲落後過內地？尤其係港府身為港鐵大股東，不知回饋長者，反而一味算死草，賺盡一分一毫，長者日提供免費服務唔係代表慷慨，而係代表涼薄咋！

嗱，港府對長者涼薄，唔止太一叮咁講o架。逾百名長者尋日前往政府總部請願，要求當局改善長者福利，包括增加安老院舍宿位名額同增加公營牙科服務等等。有示威代表更加帶來苦瓜，寓意長者生活困苦添。唉，老人家難得免費搭車，唔係把握機會遊山玩水消費購物，而係聯群結隊上街抗議，生活有幾辛酸，真係盡在不言中o架。

話時話，喺香港做老人的確好辛酸o架，未爭取到嘅福利固然遙遙無期，就算爭取到手嘅福利亦隨時有名無實。呢，好似長者生活津貼咁吖，生效已經一年，但原來唔係個個攞開生果金嘅老人都有資格領取o架。譬如有一宗個案，申請人因為兩年前中風而轉領傷殘津貼，家陣居然要再做經濟審查，結果失去領取長津資格，被迫出來做清潔工餬口，講起都可憐。當局對老人諸多留難，口惠而實不至，再做幾多敬老騷，都難掩忤逆本色喇，吓話？

其實，港府刻薄老人唔止係不孝，直頭係不智。自己知自己事，今屆政府民望低走，動輒得咎，官僚唔去爭取長者支持，反而將長者推向對立面，蠢唔蠢啲吖？現實啲講，如果港府唔係一年只做一日敬老騷，而係日日都做孝順仔，長者開心啲，社會和諧啲，政府總部畀人圍罵嘅機會都細啲啦。港府連取悅民心都唔識，正式係懵丙，叮！