城中鏡：項明生夏蕙BB玩Cosplay

話說旅遊作家James項明生早前突然宣布辭去Sony Computer Entertainment香港分公司董事之後，日前終於公布佢出任本港最大嘅網絡遊戲商智傲集團行政總裁搞手機遊戲，而佢尋日返工首日就搞咗第一場騷。

魯芬（右起）、黃夏蕙、余慕蓮同項明生一齊扮嘢。

James尋日喺深水埗出席其集團旗下嘅手機遊戲發布會，仲以一身遊戲中嘅刺客造型亮相，擺甫士時佢亦表情多多，非常投入，仲有「夏蕙BB」黃夏蕙、余慕蓮同魯芬一齊扮嘢，不知幾搞笑添！James話公司將投入二千萬港元喺手機遊戲平台，有信心手機遊戲市場會前途無限。