城中鏡：岳敏君作品慈善拍賣
國際保育組織「大自然保護協會」（TNC）日前舉辦慈善拍賣晚宴，當晚拍賣中外當代藝術傑作同頂級佳釀，包括咗當代藝術大師岳敏君、珠寶設計師陳世英（Wallace Chan）等作品，而城中政商界名人都嚟撐場，當然唔少得TNC嘅香港名人大使莫文蔚同王敏德，仲有已故船王包玉剛三女包陪麗、前滙豐私人銀行亞洲區行政總裁王以智、九巴後人雷禮權同埋立法會議員田北辰伉儷等，可謂星光熠熠。
岳敏君（左）同莫文蔚喺晚宴碰頭，仲喺岳大師嘅作品前合照。
王以智
喺踴躍嘅競投下，當晚籌得逾二千五百萬元。晚宴聯合主席及TNC亞太地區理事聯合主席曾國泰話：「我擔任咗TNC嘅義務領導工作已經逾十年，好高興睇到我哋嘅活動不斷擴展。今年慈善晚宴嘅捐款係用作保育工作，同埋加強機構嘅地區運作。」
TNC亞太區總幹事長Charles Benford亦話，拍賣晚宴不僅能夠為TNC喺亞太地區嘅工作提供資金，亦同時給予大家一個重要嘅平台去提高港人嘅保育意識，因為環境健康同每個港人都息息相關，影響住每個人嘅生活。
