城中鏡：培正中學讀足10年 顧明均留班王
香港培正創校八十周年，培正同學會前晚舉行紀念晚宴慶祝，晚宴筵開過百席，唔少城中名人都到場支持，當中包括作風低調嘅大慈善家顧明均。南太電子創辦人顧明均話喺香港培正中學足足讀咗十年都仲未畢業，所以同學會先搵佢做永遠名譽會長喎！
陳祉妤、何國鉦（後排左及右）同演繹Baby Doll系列嘅小模特兒攝於後台。
作風低調嘅大慈善家顧明均（右）與夫人當晚出席晚宴。
周松崗（右）好高興見到由美國返港相聚嘅黃老師。
黎藉冠（右一）太太羅詠詩（右二），原來同培正校董李文俊（左一）太太黃敏儀（左二），都係真光女校出品。
中學年代嘅顧明均讀書成績相當麻麻，其他人讀六年就中學畢業，但佢竟然喺培正讀足十年，當中包括三次留班同一次「撻班」，即係由中二跌番落中一再讀過。後來中學無畢業，佢就去台灣留學。雖然讀書一啲都唔叻兼成日留班，但佢仍深得老師喜愛，原來係佢經常代表學校參加校外田徑百一米欄比賽，為學校贏得唔少獎牌。
周松崗梁孔德銘記校歌
唔少培正嘅舊生已成為政經界重要人物，行政會議成員周松崗、工總名譽會長孫啟烈、足總主席梁孔德同戲劇大師鍾景輝都有即場緬懷往日時光，佢哋除咗背得出培正校歌之餘，仲互相分享讀書時期嘅趣事，大讚培正學生活潑好動，絕對唔會係書獃子。
城中一班舊生前晚亦出錢出力，幫培正小學未來教育發展籌款。著名時裝設計師Dorian何國鉦同名模Balia陳祉妤都出自培正，一衆培正幼稚園生着上由Dorian設計嘅Baby Doll系列，上演一場別開生面嘅時裝表演。同學會會長黎藉冠為晚宴出咗唔少力，全憑太太羅詠詩幫手，但太太唔係培正舊生，而係真光嘅出品。
