政壇：漏交年報周一鑊拒回應

食物及衞生局局長高永文早幾日自爆，當局喺○七/○八年起嘅五個年度，冇按法例喺限期內將負責推動控煙工作嘅吸煙與健康委員會年報提交予立法會省覽，仲為此致歉。咁擺明係前任局長「周一鑊」冇做到喇，即刻惹起議員嘅關注，唔單止質疑周一鑊根本冇睇過啲報告，仲要佢出嚟公開交代添！

周一嶽尋日出席活動時，冇回應連續五年漏交吸煙與健康委員會年報畀立法會省覽嘅原因。

事隔五日，現任平機會主席嘅周一鑊仍拒絕向公眾交代。佢尋日出席一個公開活動時，被記者追問欠交報告一事，佢只係透過同僚表示，暫時唔會回應事件。點解佢唔肯面對公眾交代事件呢？睇怕只有佢自己先至知，但佢一日未清楚向公眾交代事件，睇怕班立法會議員同市民都唔會放過佢，唔使旨意拖拖吓就甩到身。