政壇：林鄭母子同場無合照
政務司司長林鄭月娥尋日出席一個義工組織「無止橋」慈善起步禮，咁啱佢大仔Jeremy林節思又係呢個組織嘅骨幹義工，佢哋尋日各守崗位，就算同場都無合照。林鄭真係公私分明喎！
林節思唔打算從政，可能投身非牟利機構。
林鄭月娥（右二）尋日出席「無止橋」慈善起步禮。
隔幾十米 唔提對方
Jeremy尋日代表「無止橋」介紹工作，原來佢過去雖然喺英國讀書，但四年來都有做義工，專返內地幫窮鄉僻壤搭橋修路。兩母子尋日相隔幾十米都係各做各嘅事，好有默契唔提對方，又拒絕合照。每當記者問到撐唔撐媽咪做特首、又問媽咪平時同佢傾乜嘢議題時，佢都好有禮貌咁皺起眉頭話：「今日呢個場合，唔討論呢個議題喇。」讀數學、啱啱大學畢業嘅Jeremy又講明自己唔會從政，未來可能投身非牟利機構。
雖然唔肯講媽咪，但Jeremy依然樂意同記者分享難忘經歷，佢話有次去甘肅幫人起橋，見到班小朋友細細個就照顧自己，因父母出晒去其他省份打工養家，佢見到呢個情景好感觸。不過，林鄭忙得嚟咁顧家，有幾年都特別要求調去倫敦工作，就係因為要陪家人，相信Jeremy唔會覺得被媽媽冷落嘅。
