政壇：曾鈺成激將法寸學生
喺芸芸建制派當中，立法會主席曾鈺成應該算係比較開明嘅一個，最鍾意同人辯論，甚至有政界中人笑佢立場同泛民冇乜分別。做過校長嘅佢似乎好喜歡同學生傾偈，尋日佢同班「新界區傑出學生」真情對話，絕對無遊花園打官腔，學生一講唔到重點，佢就不留情面寸爆佢哋。呢種「另類教學」對學生嚟講，相信好過上堂啦！
設計圖片
「乜你講嘢咁似司長」
真情對話主題叫「2030香港我作主－香港政制發展」，本來真情對話由學生開始發問，但反斗嘅曾鈺成一坐低就玩嘢，話平時負責維持秩序，今日決定先破壞秩序，反問在場學生邊位覺得有普選後，2030年情況好過現時？點知在場近百學生得幾人舉手，咁曾鈺成就問係咪差過現時？又係得幾人舉手。之後曾鈺成就忍唔住爆咗句「呢度唔係個個都係傑出學生咩？乜傑出學生唔講嘢嘅咩？」
畀曾鈺成寸完後，班學生終於有少少反應，睇嚟激將法有啲效果喎！呢個時候佢又問班學生到底乜嘢叫「作主」，有學生就話市民作主除咗要知道權利外，仲要知自己有乜義務。曾鈺成聽到答案後眉頭皺晒，仲加多句：「乜你講嘢咁似我哋啲司長嘅！」暗諷學生講嘢遊花園唔到題。
班學生面對佢咄咄逼人，好多都招架不住唔敢問問題。曾鈺成見好就收，到後期猛讚班學生有承擔，又叫佢哋多啲從政。點知佢轉個頭就話，早前建仔先拒絕兩位外國名牌大學尖子，以免「嘥咗佢哋」。呢頭拒絕一等一尖子，轉頭又叫人從政，佢究竟當台下班學生係乜，心水清一定知。
不過，喜歡鬥嘴嘅曾鈺成都唔係冇弱點，當記者追問佢點睇黨友鍾樹根公然喺議事廳大叫王維基「收皮」時，好辯嘅佢都唔識答，惟有笑笑口走人。
