閉路電視危危乎 海事官僚懶懶閒

話說港澳碼頭內外裝咗約一百部閉路電視，其中三十五部喺室外，由於長期受到潮濕海風嘅侵蝕同強風影響，已經嚴重老化生銹，搖搖欲墜，險象環生，隨時爆大鑊。

唔係靠嚇o架，早幾個月之嘛，其中一個閉路電視鏡頭突然跌咗落嚟，出事地點平時人來人往，好彩當時冇人經過咋，否則分分鐘搞出人命。閉路電視本來應該用嚟監察船舶停泊、場地保安同人流情況，家陣唔止未能發揮應有嘅作用，反而成為計時炸彈，危及乘客安全，負責管理嘅海事處擺明失職喇。

據知情人士爆料，原來早喺三年前，負責維修保養嘅機電工程署已經發現室外閉路電視出現老化問題，通知海事處要即時全面更換，點知海事處好似冇件事咁，一拖再拖，淨係叫機電署派人做加固工程。

最離譜就係，海事處拖延嘅理由居然係「冇錢」，問你服未。人命關天，唔通一句冇錢就乜都唔使做？咁同攞乘客安全較飛有乜分別？正如有立法會議員話齋，冇錢唔係理由，政府並非缺乏資源，立法會亦會因應各部門需要批出款項作改善及保養工程。

話到尾，冇錢只係藉口咋，海事處根本就係懶惰失職。處方自己都識講，閉路電視壽命一般有十年，實際時間視乎操作環境而定喇。呢批設施雖然只係用咗九年，但室外閉路電視長期受到海水嘅鹽分、空氣濕度同陽光照射影響，一般壽命只有五到七年，海事處對安全隱患視而不見，仲唔係失職？仲唔係草菅人命？

講到海事處失職，不得不提舊年嘅南丫島海難，如果唔係海事處官僚做事馬虎，推搪塞責，由審批船隻圖則、監督建造，到檢驗程序，一條龍犯錯甩漏，埋下沉船禍根，三十九名市民何至於淪為怒海冤魂！

講開又講，草菅人命嘅又點止海事處吖，懶惰失職已經成為港產官僚嘅通病。呢，好似通街吊吊揈嘅危險招牌，仲有隨時倒塌奪命嘅病樹枯樹，梗有一個危機喺左近，屋宇署及樹木辦等衙門監管甩漏，難辭其咎。計太一叮話齋，計時炸彈處處，令人防不勝防，香港最大嘅安全隱患，就係呢班尸位素餐嘅港產官僚嘞，叮！