所以喺呢度不厭其煩再講講潮語「大V」。「大V」係內地嘅網絡語言，意思即係一啲網上知名嘅意見領袖（Opinion Leader），佢哋喺網上經常發表一啲評論或者言論，而且擁有成千上萬嘅追隨者，追睇佢哋嘅文章。因為呢類名人，喺微博上有個「V」字嘅標示，所以一啲人氣爆燈嘅微博博客就會被稱為「大V」。

中共十八大三中全會剛剛閉幕，外界開頭揣測會拿出一啲深化改革措施，結果係點？當然係無驚喜，但經過今次大會，決定成立國家安全委員會。呢個國安會裏面將包括好多現有政府部門，涵蓋黨政軍，表面上係防止國家免受外國攻擊，但係各界普遍認為，國安委成立，查實係將維穩制度化、合理化。

話時話，今時今日有邊個國家會對中國構成安全威脅？邊啲人會對中國不利？當然係自己嘅人民最危險，所以搞個國安委出嚟，維持國家穩定罷。尤其係今時今日資訊發達，網絡無遠弗屆，網民隨時可以將一個政權推翻，網絡「大V」嘅影響力，分分鐘大過一個省委書記，唔加大力度管理，點得？

好多「大V」嘅粉絲數目去到成千萬！所以日後國安委成立咗之後，「大V」們嘅言論可能進一步遭打壓。因為「大V」嘅言論，有啲係帶有對政府嘅抨擊，如果畀網民組織起嚟，霎時爆大鑊衝擊政治穩定，呢個當然係當權者心腹大患。「大V」不一定講政治，有啲「大V」都會講吓生活上其他嘢，甚至係為商業機構賣廣告做代言人，一言以蔽之，「大V」就係網絡權威人士嘅意思。國家安全委員會對香港有咩影響，暫時係未知之數，不過以中港不斷深化「膠」流融合之勢，香港肯定不能獨善其身！

第一手消息請下載on.cc東網iPhone/iPad/Android/Windows Phone Apps