「邊個夠膽睇低《爛果》？」一返到公司收到風，成日認屎認屁的「另哥」賭大細，賭嘅唔係錢，亦都唔係J，竟然係《爛果》，激到少膽虫紮紮跳，谷到要叫膠蘇飛的外賣千蚊Lunch下火先得。
「腦腫，用長白山人參沖嘅貓屎咖啡呀，唔好嬲飲啖先……」膠蘇雖然滴住汗，連鞋都唔除就捧杯咖啡過嚟，少膽虫心裏嘅怒火都係熄唔到，「死蠢！呢啖氣點吞？佢話跪住返屋企呀！擺明無放過壹全霉在眼內！雖然《爛果》靠宣淫販賤起家，但係我哋都有市場佔有率，家吓擺明就係太歲頭上動土！」「腦腫，咁你諗住點對付佢？」膠蘇頭耷耷咁問。對付佢？少膽虫最火滾嘅係，「另哥」攞咗次彩，見好仲未識收，仲趁機加幾錢肉緊踩多爛果一鑊！「點止對付咁簡單？佢連條命都攞埋出嚟呀！」
「腦腫，其實『另哥』係賭啲咩啫？」肥豪成個拓也哥咁款，一臉無知，輕托下巴問少膽虫啲低B問題，見到佢咁「忍樣」，少膽虫又再無名火起，決定教訓佢：「人哋話《爛果》賣夠三十萬份就去死呀！我哋聽日賣唔夠三十萬份，你一於去死！」
豈料，肥豪好開心咁答：「咁我一定唔使死喇，哈哈！」一記拳頭，正緩緩升起……
第一手消息請下載on.cc東網少膽虫
