政壇：搞搞政：何君堯叫戴耀廷先絕食
港大法律學者戴耀廷係「佔領中環」行動（佔中）發行人之一，佢哋呢項運動經常畀人批評係知法犯法，早前律師會會長林新強亦狠批佔中係濫用公義，接棒嘅仲有該會前會長何君堯，何直指佔中就好似「政治迷債」咁，又話戴耀廷將佔中比喻為公民抗命，叫人走去犯法，但佢自己就好錫身，提議戴耀廷應該先行絕食。
何君堯呢句「政治迷債」，早在三年前已有中西區區議員張國鈞使用過，張當時係諷刺五名立法會議員辭職引發嘅所謂「五區公投」，依家何君堯認為佔中都係咁，想當年迷債畀人包裝到好吸引，吸引啲人落疊，到最後美麗嘅包裝只係變咗殘酷嘅財政泥氹及陷阱，大把人血本無歸。佔中被喻為「政治迷債」，似乎正係指吸引嘅包裝，唔代表結果亦美好。講到佔中，何君堯又指戴耀廷好錫身，建議佢先行絕食。
講完政治後，佢又講到之前同其他新界鄉紳組成嘅「新界關注大聯盟」，話明唔同意擴建垃圾堆填區，又怕屯門堆填區同將來嘅龍鼓灘填海範圍好近，擔心到時變成另一個將軍澳喎。
