政壇：議員踢波埋門常撻Q

立法會隊尋日得「最低門檻」嘅六個議員參加，再加多十八個外援，包括多名立法會保安員，結果全場要靠保安員擔大旗入波，班議員只係入得一球，仲經常埋門撻Ｑ，好彩最後成功以四比一延續不敗神話。

立法會足球隊六名議員之中，有經常落場嘅漁農界何俊賢、陳克勤、勞工界郭偉強、梁志祥同資訊科技界莫乃光。郭偉強差唔多踢足全場，但經常喺埋門一腳先至撻Ｑ，搞到隊長克勤仔喺場邊猛話要換人，又講笑話要出動俗稱「尚方寶劍」嘅特權法，調查郭偉強係咪因為飲咗對手嘅汽水而放軟手腳。點知到比賽尾聲，佢自己都臨門腳軟。