政壇：高永文手踏單車索晒氣

傷殘青年協會尋日搞咗個「健障行」傷健共融活動，仲邀請一眾嘉賓試騎傷殘人士嘅「手踏單車」，食物及衞生局局長高永文首試用對手來踩單車，起步時仲係威係勢，表現非常興奮，仲話好輕鬆添，點知行咗五百米已經索晒氣，有啲雞手鴨腳。

高永文騎手踏單車，體驗傷殘人士之苦。

高醫生初上車時好興奮，仲話只係騎五公里唔夠喉，在場義工糾正佢，佢哋只需踩五百米咋！出發喇，去到五百米中途站，高醫生大汗淋漓，佢雖然死撐好輕鬆，仲話記者笑佢索晒氣好委屈喎！但呢頭講完，嗰頭就即刻叫助手拎水畀佢飲，餘下路程亦不再如初時輕鬆。

尋日共有五百名健全同殘疾人士參加活動，健全人士戴上「膝部固定器」體驗殘障嘅困難，有市民話戴咗「膝部固定器」後，隻腳屈曲唔到，非常辛苦。